सर्लाही ३१ असार
सर्लाहीको बलरा नगरपालिकामा खेतमा सिँचाइ गर्ने क्रममा करेन्ट लागेर एक जना भारतीय नागरिकको मृत्यु भएको छ । बलरा नगरपालिका–१ हथियौलमा मंगलबार राति खेतमा पानी पटाउने क्रममा विद्युतीय करेन्ट लाग्दा भारतको बिहार राज्य, सितामढी जिल्ला, श्रीनगर निवासी करिब ५० वर्षीय अरबिन्द कुमार सिंहको घटनास्थलमै मृत्यु भएको प्रहरीले जनाएको छ । मृतक सिंह स्थानीय सुरेन्द्र प्रसाद सिंहको खेत बटैयामा (उब्जनी बाँड्ने सर्तमा) लिएर खेती गर्दै आएका थिए । जिल्ला प्रहरी कार्यालय सर्लाहीका अनुसार घटना मंगलबार राति भए पनि मृतकका आफन्तले शव घरतर्फ लैजान लागेको अवस्थामा बुधबार बिहान करिब १० बजे मात्र प्रहरीलाई जानकारी प्राप्त भएको थियो। सूचना प्राप्त हुनासाथ प्रहरी चौकी छन्कीटोला र इलाका प्रहरी कार्यालय गडहियाबाट प्रहरी टोली घटनास्थल पुगेको थियो । प्रहरीले घटनास्थलको प्रारम्भिक मुचुल्का तयार गरी शवलाई पोस्टमार्टमका लागि प्रादेशिक अस्पताल मलङ्गवा पठाएको छ । घटनाका सम्बन्धमा थप अनुसन्धान भइरहेको जिल्ला प्रहरी कार्यालय सर्लाहीका प्रवक्ता तथा प्रहरी नायव उपरीक्षक (डीएसपी) वेदप्रसाद गौतमले जानकारी दिएका छन् ।
सिँचाइ गर्ने क्रममा सर्लाहीमा करेन्ट लागेर भारतीय नागरिकको मृत्यु
