राैतहट २५ असार
रौतहटको मौलापुर नगरपालिकामा लामो समयदेखि प्रमुख प्रशासकीय अधिकृत नहुँदा नगरपालिकाको प्रशासनिक तथा विकास निर्माणका काम प्रभावित भएको भन्दै स्थानीयले बिहीबार विरोध प्रदर्शन गरेका छन् ।
प्रदर्शनका क्रममा आक्रोशित स्थानीयले प्रधानमन्त्री वालेन्द्र (बालेन) शाहको पुतला दहन गर्दै सरकारविरुद्ध नाराबाजी गरेका हुन् । उनीहरूले मौलापुर नगरपालिकामा तत्काल प्रमुख प्रशासकीय अधिकृत खटाउन माग गर्दै विभिन्न नारासमेत लगाएका थिए । प्रदर्शनकारीले “मौलापुरको बजेट फ्रिज गराउने सरकार मुर्दाबाद”, “मौलापुरमा हाकिम पठाऊँ”, “अदालतको आदेश कार्यान्वयन गर”, “नगरपालिकालाई हाकिमविहीन बनाउने षड्यन्त्र बन्द गर” लगायतका नाराबाजी गरेका थिए । स्थानीयका अनुसार संघीय मामिला तथा सामान्य प्रशासन मन्त्रालयले प्रमुख प्रशासकीय अधिकृतका रूपमा सुरेशबाबु घिमिरेलाई सरुवा गरेको भए पनि उनले नगरपालिकामा हाजिर नभएपछि मन्त्रालयले उनलाई फिर्ता बोलाएको थियो । त्यसपछि हालसम्म नयाँ प्रमुख प्रशासकीय अधिकृत नखटाइँदा नगरपालिकाको प्रशासनिक तथा आर्थिक गतिविधि प्रभावित भएको जनाइएको छ । प्रमुख प्रशासकीय अधिकृतको अभावका कारण नगरपालिकाको बजेट कार्यान्वयन, भुक्तानी प्रक्रिया तथा अन्य दैनिक प्रशासनिक काम प्रभावित बनेका छन्। नगर शिक्षकहरूले छ महिनादेखि तलब नपाएको भन्दै यसअघि पेन डाउन आन्दोलनसमेत गरेका थिए। त्यसैगरी बहुक्षेत्रीय पोषण कार्यक्रमका लाभग्राही तथा सरसफाइ कर्मचारीहरूले पनि लामो समयदेखि भुक्तानी नपाएको गुनासो गरेका छन् ।
स्थानीयले जनप्रतिनिधि, कर्मचारी र सरोकारवाला निकायलाई समस्याको शीघ्र समाधान गरी नगरपालिकाको सेवा प्रवाहलाई सहज बनाउन आग्रह गरेका छन् ।
प्रमुख प्रशासकीय अधिकृत नपठाएको भन्दै मौलापुरमा प्रदर्शन, प्रधानमन्त्रीको पुतला दहन
