चन्द्रनिगाहपुर २९ बैशाष
रौतहटको चन्द्रपुर नगरपालिकाले अव्यवस्थित बसोबासी तथा सुकुम्बासीलाई ३५ दिनभित्र घर–टहरा हटाउन सूचना जारी गरेपछि स्थानीयस्तरमा आन्दोलन चर्किन थालेको छ । पीडित सुकुम्बासीहरुको पक्षमा उभिँदै आदिवासी जनजाति महासंघ रौतहटले पहिलो चरणमै नगरपालिका घेराउसहित ज्ञापन पत्र बुझाउने घोषणा गरेको छ । मंगलबार चन्द्रपुर–४ स्थित हातेमालो सामुदायिक वनको सभा हलमा सुकुम्बासी तथा अव्यवस्थित बसोबासीहरुको बृहत भेलाले नगरपालिकाको कदमप्रति तीव्र असन्तुष्टि व्यक्त गर्दै “व्यवस्थापनबिनाको डोजर स्वीकार्य नहुने” चेतावनी दिएको हो । भेलामा सहभागी सुकुम्बासीहरुले आफूहरूमाथि राज्यले दमन गर्न खोजेको आरोप लगाउँदै “जस्तोसुकै परिस्थिति सामना गर्न तयार रहेको” बताएका छन् ।
भेलामा बोल्दै चन्द्रपुर–३ का सुकुम्बासी प्रेम तामाङले लोकतान्त्रिक व्यवस्थामा नागरिकको गाँस, बास र कपासको अधिकार सुनिश्चित हुनुपर्ने उल्लेख गर्दै व्यवस्थापनबिनै घरबार भत्काउने नीति अमानवीय र तानाशाही प्रवृत्तिको उदाहरण भएको बताए । उनले गरिब, भूमिहीन तथा अव्यवस्थित बसोबासीलाई सडकमा पुर्याउने कार्य कुनै हालतमा स्वीकार नगर्ने चेतावनी दिए ।
भेलाले तत्काल नगरपालिकाले जारी गरेको ३५ दिने सूचना खारेज गर्न माग गर्दै देशभरका अव्यवस्थित बसोबासी तथा सुकुम्बासीहरुको दीर्घकालीन व्यवस्थापनसहित समस्या समाधानको बाटो खोज्न स्थानीय सरकारसँग आग्रह गरेको छ । उता आदिवासी जनजाति महासंघ रौतहटले पनि नगरपालिकाको कदमप्रति आपत्ति जनाउँदै आम नागरिकको पक्षमा आफूहरू उभिएको जनाएको छ । महासंघले पहिलो चरणअन्तर्गत २०८३ वैशाख ३१ गते बिहीबार चन्द्रपुर नगरपालिकाको कार्यालय घेराउ गर्दै ज्ञापन पत्र बुझाउने कार्यक्रम तय गरेको छ ।
महासंघका नेताहरूले ज्ञापन पत्रको बेवास्ता गरिए थप कडा संघर्षका कार्यक्रम घोषणा गरिने चेतावनी दिएका छन् । अहिले चन्द्रपुर क्षेत्रमा सुकुम्बासी बस्ती हटाउने विषयलाई लिएर तनाव बढ्दै गएको छ भने स्थानीय सरकार र पीडित पक्षबीच टकरावको अवस्था सिर्जना हुने संकेत देखिएको छ ।
