रौतहट २४ माघ
रौतहट जिल्लामा महिलामा देखिने पाठेघरको मुखको क्यान्सर रोकथामका लागि एचपीभी (ह्युमन पापिलोमा भाइरस) खोप अभियान दुई चरणमा सञ्चालन गरिने भएको छ । स्वास्थ्य कार्यालय रौतहटको आयोजनामा जिल्ला प्रशासन कार्यालयको सभा हलमा राष्ट्रिय खोप कार्यक्रम अन्तर्गत जिल्ला स्तरीय खोप समन्वय समिति तथा सञ्चारकर्मीहरूसँग अभिमुखीकरण कार्यक्रम सम्पन्न गरिएको हो । कार्यक्रममा विश्व स्वास्थ्य संगठन (डब्लुएचओ) का डा. सुरेश शुक्लाले पाठेघरको मुखको क्यान्सरको वर्तमान अवस्था, जोखिमका कारण र एचपीभी खोपको प्रभावकारिताबारे जानकारी गराउँदै प्रारम्भिक किशोरावस्थामै खोप लगाउँदा भविष्यमा हुने क्यान्सरको जोखिम उल्लेखनीय रूपमा घट्ने बताउनु भयो । स्वास्थ्य कार्यालय रौतहटका प्रमुख राजेश सिंहका अनुसार १० देखि १४ वर्ष उमेर समूहका किशोरीहरूलाई लक्षित गरी खोप अभियान सञ्चालन गरिने छ । कक्षा ६ देखि १० सम्म अध्ययनरत छात्रा तथा विद्यालय बाहिर रहेका किशोरीहरूलाई पनि खोप सेवा उपलब्ध गराइने उहाले जानकारी दिनु भयो । प्रमुख जिल्ला अधिकारी दिनेश सागर भुसालले अभियान सफल बनाउन स्थानीय तह, स्वास्थ्यकर्मी, शिक्षक, अभिभावक तथा सञ्चारकर्मीहरूको सक्रिय भूमिका आवश्यक रहेको बताउनु भयो । स्वास्थ्य कार्यालयका अनुसार पहिलो चरणमा माघ २५ गतेदेखि फतुवा विजयपुर, बौधिमाई, मौलापुर, गढिमाई, ईशनाथ, परोहा, देवाही गोनाही र राजपुर नगरपालिकामा खोप सेवा सञ्चालन हुनेछ। दोस्रो चरण फाल्गुन १ गतेदेखि चन्द्रपुर, गुजरा, वृन्दावन, गरुडा, माधव नारायण, गौर, कटहरिया, राजदेवी नगरपालिका तथा यमुनामाई र दुर्गा भगवती गाउँपालिकामा खोप कार्यक्रम सञ्चालन गरिने छ । कार्यक्रमका सभापति राम अयोध्या राय यादवले किशोरीहरूको स्वास्थ्य सुरक्षाका लागि यो अभियान अत्यन्तै महत्त्वपूर्ण रहेको उल्लेख गर्दै समयमै खोप लगाउँदा भविष्यमा पाठेघरको मुखको क्यान्सरबाट जोगिन सकिने बताउनु भयो ।
रौतहटमा एचपीभी खोप अभियान दुई चरणमा सञ्चालन हुने
