राैतहट १९ पुस
रौतहटको चन्द्रनिगाहपुरमा तामाङ समुदायको महान पर्व २८६२औँ ता–ल्हो सोनाम ल्होछारको अवसरमा बृहत् सांस्कृतिक कार्यक्रम आयोजना हुने भएको छ। परम्परा, पहिचान र सांस्कृतिक एकताको सन्देश बोकेको यस कार्यक्रमले चन्द्रनिगाहपुर क्षेत्रलाई उत्सवमय बनाउने अपेक्षा गरिएको छ । आयोजकका अनुसार कार्यक्रममा राष्ट्रिय ख्याती प्राप्त कलाकारहरूका साथै स्थानीय कलाकारहरूको आकर्षक प्रस्तुति रहनेछ। मौलिक तामाङ संस्कृति झल्काउने नृत्य, गीत–संगीत र सांस्कृतिक झाँकीमार्फत दर्शकलाई मनोरञ्जनसँगै सांस्कृतिक चेतना प्रदान गरिनेछ । कार्यक्रम मिति २०८२ माघ ५ गते चन्द्रनिगाहपुरस्थित टेकान वन क्वाटरमा रहेको स्याडुप फेन्दे बौद्ध गुम्बा परिसरमा आयोजना हुनेछ । धार्मिक तथा सांस्कृतिक दृष्टिले महत्वपूर्ण मानिने उक्त स्थलमा हुने कार्यक्रमले समुदायबीच आपसी सद्भाव थप मजबुत बनाउने विश्वास लिइएको छ । शनिबार सम्पन्न नेपाल तामाङ घेदुङ रौतहट तथा घेदुङ चन्द्रपुर नगर कमिटीको संयुक्त बैठकले कार्यक्रमलाई भव्य र सभ्य रूपमा सम्पन्न गर्ने निर्णय गरेको हो । मुल आयोजक समितिका संयोजक हर्क बहादुर तामाङ मोक्तानका अनुसार ल्होछारलाई केवल पर्वका रूपमा होइन, तामाङ समुदायको इतिहास, भाषा र संस्कृतिको संरक्षण तथा प्रवर्द्धनको अवसरका रूपमा मनाइनेछ ।
आयोजक समितिले सम्पूर्ण समुदाय, सांस्कृतिक प्रेमी तथा सर्वसाधारणलाई कार्यक्रममा उपस्थित भई उत्सवलाई सफल बनाउन आग्रह गरेको छ ।
चन्द्रनिगाहपुरमा २८६२औँ ता–ल्हो सोनाम ल्होछारको भव्य सांस्कृतिक उत्सव हुने
