राैतहट १३ पुस
रौतहट सदरमुकाम गौरस्थित करदाता सेवा कार्यालय हटाउने सरकारी निर्णयको विरुद्ध आजदेखि खुलेआम विरोध सुरु भएको छ। उक्त निर्णयले जिल्लाका उद्योगी, व्यापारी र सर्वसाधारण करदातालाई प्रत्यक्ष असर पर्ने भन्दै रौतहट उद्योग वाणिज्य संघले गौर करदाता सेवा कार्यालयको मुख्य प्रवेशद्वारमै धर्ना कार्यक्रम थालेको हो । संघका पदाधिकारीहरूका अनुसार करदाता सेवा कार्यालय हटाइएमा करसम्बन्धी सेवा लिन जिल्लाबाहिर जानुपर्ने अवस्था सिर्जना हुने, समय र खर्च दुवै बढ्ने तथा व्यवसायिक गतिविधि थप प्रभावित हुने चिन्ता रहेको छ। “सेवा केन्द्र हटाउनु भनेको रौतहटका करदातामाथि अनावश्यक बोझ थप्नु हो,” संघका एक प्रतिनिधिले बताए । धर्नामा सहभागी उद्योगी–व्यवसायीहरूले कार्यालय यथास्थानमै कायम गर्न माग गर्दै विभिन्न नारा तथा प्लेकार्ड प्रदर्शन गरेका छन्। उनीहरूले माग सुनुवाइ नभएसम्म चरणबद्ध आन्दोलनलाई निरन्तरता दिने चेतावनी समेत दिएका छन् । संघले सम्बन्धित निकायसँग तत्काल वार्ता गरी निर्णय पुनर्विचार गर्न आग्रह गरेको छ। स्थानीय तह, व्यवसायिक समुदाय र नागरिक समाजको साझा सरोकारको विषय भएकाले सरकारले यस विषयलाई गम्भीरतापूर्वक लिनुपर्ने उनीहरूको जोड छ।
गौरमा करदाता सेवा कार्यालय हटाउने निर्णयको विरोध चर्कियो, उद्योगी–व्यवसायी आन्दोलित
