सर्लाही, २८ माघ । सर्लाहीमा एक उदाहरणीय आदर्श विवाह सम्पन्न भएको छ, जसले समाजमा मौलाएको दाइजो प्रथा र जातीय विभाजनलाई चुनौती दिएको छ। सर्लाहीको कविलासी नगरपालिका–७ निवासी उज्ज्वल राज साह र हरिपुर निवासी आँचल सरकार बीच माघ २५ गते बिना दाइजो र सामाजिक समरसताको प्रतीक बनेर विवाह सम्पन्न भएको हो।
मधेश क्षेत्रमा जातीय कारणले विवाहमा प्रायः विवाद उत्पन्न हुने गरेको सन्दर्भमा, यो विवाहले समाजमा समानता र एकताको सन्देश प्रवाह गरेको छ। पुर्व प्रतिनिधि सभा सदस्य प्रमोद साहका अनुसार, विवाहले समाजमा सकारात्मक प्रभाव पार्ने र युवाहरूलाई सही मार्गदर्शन दिने विश्वास गरिएको छ।
उज्ज्वलराज साह लालबन्दी नगरपालिकास्थित लर्ड ब्राइट स्कुलका उत्कृष्ट विद्यार्थी थिए। उनी टपर भएपछि विद्यालयले उनको तस्बिर फ्रेममा राख्यो, जसलाई आँचल सरकारले सामाजिक सञ्जालमा देखेपछि उनीहरूबीच मित्रता बढ्यो। पारिवारिक भेटघाटपछि दुबै परिवारबीच नजिकको सम्बन्ध स्थापित भयो र अन्ततः बिना दहेज विवाह गर्ने सहमति भयो।
आँचल बंगाली कायस्थ समुदायकी हुन् भने उज्ज्वल व्याहुत कलवार समुदायका हुन्। जातीय विविधता हुँदाहुँदै पनि उनीहरूको विवाह पारिवारिक सहमतिमा परम्परागत एवं सामाजिक मर्यादालाई सम्मान गर्दै सम्पन्न भएको हो। विवाहका क्रममा बेहुलीका पिता माधव सरकारले भने, “यो विवाह समाजका लागि एक नयाँ दिशा हो। हामीले सामाजिक कुरीतिहरूलाई हटाउने प्रयास गरेका छौं।”
आँचल नेपालमा ब्रिटिस कलेजमा एमबीए दोस्रो वर्षमा अध्ययनरत छिन् भने उज्ज्वल अमेरिकाबाट सफ्टवेयर इञ्जिनियरिङ (आईटी) अध्ययन गरी फर्किएका छन्। उनीहरूको अमेरिकामा ग्रिन कार्ड समेत प्राप्त भइसकेको छ।
यो विवाहले समाजमा आदर्श विवाहको उदाहरण प्रस्तुत गरेको छ, जसले परम्परागत दाइजो प्रथा र जातीय भेदभावलाई चुनौती दिएको छ। मधेश क्षेत्रमा भागेर विवाह गर्ने प्रवृत्तिको बढ्दो संस्कृतिलाई समेत यसले सकारात्मक सन्देश दिएको छ। विवाहलाई सम्मानजनक बनाउने क्रममा बेहुलाका पिता भरत साह र बेहुलीका पिता माधव सरकारले विशेष भूमिका निर्वाह गरेका थिए।
यो ऐतिहासिक विवाह समारोहमा विभिन्न विशिष्ट व्यक्तित्वहरू सहभागी भएका थिए। पूर्व मन्त्री तथा प्रतिनिधि सभा सदस्य महेन्द्र राय, संविधान सभा सदस्य रामचन्द्र चौधरी, रिजवान अंसारी, रंजना सरकार, नेकपा एमालेका जिल्ला अध्यक्ष राजनारायण साह, नेपाली कांग्रेसका पूर्व जिल्ला सभापति नागेन्द्र राय, हरिपुर नगर प्रमुख गोपाल पजियार लगायत जिल्लाका विशिष्ट व्यक्तिहरूको उपस्थिति रहेको थियो।
यो विवाह समाजमा समानता, प्रेम, सम्मान र परस्पर सहयोगको भावना फैलाउन सफल भएको छ। जातीय भेदभाव हटाउने र सामाजिक एकताको मार्ग प्रशस्त गर्ने यो विवाहले नयाँ पुस्तालाई प्रेरित गर्ने विश्वास गरिएको छ।
यसरी, उज्ज्वलराज साह र आँचल सरकारको विवाह मधेश समाजका लागि मात्र होइन, नेपालकै लागि आदर्श उदाहरण बनेको छ, जसले सामाजिक परिवर्तनको बाटो खोल्ने विश्वास गरिएको छ।
