रौतहट, १६ माघ । पाठेघरको मुखको क्यान्सर नियन्त्रणका लागि रौतहटमा १० देखि १४ वर्ष उमेर समूहका किशोरीलाई लक्षित गर्दै एचपीभी (ह्युमन प्यापिलोमा भाइरस) खोप अभियान माघ २२ गतेबाट सञ्चालन हुने भएको छ । माघ २२ देखि फागुन ६ गतेसम्म सञ्चालन हुने यो अभियानमा कक्षा ६ देखि १० सम्म अध्ययनरत तथा विद्यालयबाहिर रहेका बालिकालाई खोप लगाइनेछ ।
जिल्ला स्वास्थ्य कार्यालय रौतहटले स्थानीय तहहरुसँग सहकार्य गरी ४९ हजार २६९ जना छात्राको तथ्याङ्क संकलन गरी खोप अभियानको तयारी पूरा गरेको जनाएको छ । अभियानका लागि दुई चरणमा कार्यक्रम सञ्चालन गरिने जिल्ला स्वास्थ्य कार्यालय रौतहटले जनाएको हो ।
जिल्ला स्वास्थ्य कार्यालय प्रमुख राजेश सिंहका अनुसार पहिलो चरण माघ २३ गतेदेखि सुरु भई फतुवा विजयपुर, मौलापुर, बौधीमाई, गढीमाई, कटहरिया, देवाही गोनाही, राजपुर, परोहा र इशनाथमा खोप लगाइने छ । दोस्रो चरण भने माघ ३० गतेदेखि गौर, राजदेवी, दुर्गा भगवती, यमुनामाई, माधवनारायण, गरुडा, वृन्दावन, गुजरा र चन्द्रपुरमा सञ्चालन हुनेछ ।
खोप अभियानमा ३९ हजार छात्रा सामुदायिक तथा संस्थागत विद्यालयमा र १० हजार बढी विद्यालयबाहिर रहेका बालिका सामेल हुने छन् ।
सरकारले डब्लुएचओ (विश्व स्वास्थ्य संगठन) द्वारा प्रमाणित एचपीभी खोपमार्फत किशोरीहरुलाई भविष्यमा पाठेघरको मुखको क्यान्सरको जोखिमबाट सुरक्षित गर्न पहल थालेको हो ।
स्वास्थ्य मन्त्रालयका तथ्याङ्कअनुसार नेपालमा हरेक वर्ष २ हजार २ सय महिलामा पाठेघरको मुखको क्यान्सर देखिने गरेको छ । तीमध्ये झण्डै १३ सय महिलाको ज्यान जाने गरेको छ । यो तथ्यांकले नेपालमा यो रोगको उच्च जोखिमलाई स्पष्ट पार्छ ।
रौतहटकी स्वास्थ्यकर्मी रीता देवीका अनुसार खोप अभियानका लागि जनचेतना अभिवृद्धि प्रमुख चुनौती हो । कतिपय अभिभावक खोपबारे गलत धारणा राखेछन् । अभियान सफल बनाउनका लागि हामीले समुदायमा व्यापक प्रचारप्रसार गरेका छौं, उनले बताइन् । रौतहटमा दुर्गम क्षेत्रका विद्यालयमा विद्यार्थीहरुको पहुँच सुनिश्चित गर्न पनि स्वास्थ्यकर्मी र शिक्षकहरुको समन्वयमा विशेष योजना लागू गरिएको छ । स्वास्थ्यकर्मीहरुका अनुसार एचपीभी खोपले पाठेघरको मुखको क्यान्सरको जोखिमलाई ९० प्रतिशतसम्म कम गर्न सकिन्छ । यस खोप अभियानले नेपाल सरकारको दीर्घकालीन लक्ष्य—सन् २०३० सम्म पाठेघरको मुखको क्यान्सरका केसलाई आधामा घटाउने—प्रति महत्वपूर्ण योगदान दिनेछ ।
रौतहटमा ४९ हजार २६९ किशोरीहरुलाई एचपीभी खोप लगाइँदै
