रौतहट, २२ साउन
रौतहटको गौर–चन्द्रपुर सडकखण्डअन्तर्गत बम नहर चोक नजिक रहेको यमुनामाई गाउँपालिका–५ झुनखुनवा टोलमा बाढीका कारण जमेको पानीमा डुबेर एक बालकको दुःखद मृत्यु भएको छ । स्थानीयका अनुसार बालक बाढीको पानीमा हराएको जानकारी प्राप्त हुनासाथ नेपाल प्रहरी, स्थानीयवासी तथा अन्य सरोकारवालाहरूले तत्काल खोजी अभियान सञ्चालन गरेका थिए । लामो खोजीपछि बालकलाई जमेको पानीमा तैरिरहेको अवस्थामा फेला पारिएको थियो। उद्धार गरी उपचारका लागि लैजाने प्रयास भए पनि उनको ज्यान जोगाउन सकिएन । हाल लगातारको वर्षासँगै जिल्लाका विभिन्न स्थानमा बाढी र डुबानको जोखिम बढ्दै गएको छ । खोलानाला तथा सडक आसपास पानी जम्दा विशेष गरी बालबालिका बढी जोखिममा पर्ने भएकाले अभिभावकलाई उच्च सतर्कता अपनाउन आग्रह गरिएको छ । सम्बन्धित निकायले पनि अनावश्यक रूपमा बाढीको पानी, खोलानाला तथा डुबानग्रस्त क्षेत्रमा नजान र सुरक्षित स्थानमा बस्न सबै नागरिकलाई अनुरोध गरेको छ। मौसममा अझै प्रतिकूल अवस्था रहने सम्भावना रहेकाले रौतहटवासीलाई आवश्यक सावधानी अपनाउन र कुनै आपत्कालीन अवस्था देखिएमा तत्काल सुरक्षा निकायलाई खबर गर्न आग्रह गरिएको छ ।
बाढीको पानीमा डुबेर बालकको दुःखद मृत्यु, रौतहटवासीलाई सतर्क रहन आग्रह
