काठमाडौं । भारतमा जारी आईसीसी एकदिवसीय विश्वकपमा पाकिस्तानले दोस्रो हार बेहोरेको छ । पाकिस्तानले शुक्रबार भएको खेलमा अस्ट्रेलियासँग ६२ रनको हार बेहोरेको हो ।
भारतको चेन्नाईस्थित एमए चिदम्बरम रंगशालामा सम्पन्न खेलमा अस्ट्रेलियाले प्रस्तुत गरेको ३६८ रनको लक्ष्य पछ्याएको पाकिस्तानले ४५.३ ओभरमा सबै विकेट गुमाएर ३०५ रन मात्र बनाउन सक्यो ।
पाकिस्तानका ओपनरद्वय इमाम उल हक र अब्दुल्लाह सफिकले क्रमशः ७० र ६४ रन बनाए पनि टिमको हार टार्न सकेनन् । यी दुईले पहिलो विकेटका लागि १३४ रनको साझेदारी गर्दै पाकिस्तानलाई उत्कृष्ट सुरुआत दिलाएका थिए । तर, यसपछिका अन्य ब्याटरले सम्हालिएर प्रदर्शन गर्न नसक्दा पाकिस्तान लक्ष्यसम्म पुग्न सकेन ।
मोहम्मद रिजवानले ४६, साउद साकिलले ३०, इफ्तिखर अहमेदले २६, कप्तान बाबर आजमले १८, मोहम्मद नवाजले १४ र साहिन साह अफ्रिदीले १० रन जोडे ।
अस्ट्रेलियाका एडम जाम्पाले चार विकेट लिए । प्याट कुमिन्स र मार्कुस स्टोइनिसले समान दुई विकेट लिए । यस्तै, मिचेल स्टार्क र जस हेजलउडले एक(एक विकेट लिए ।
त्यसअघि, टस हारेर ब्याटिङमा आएको अस्ट्रेलियाले निर्धारित ओभरमा नौ विकेट गुमाएर ३६७ रनको योगफल खडा गरेको थियो ।
अस्ट्रेलियाका ओपनरद्वय डेविड वार्नर र मिचेल मार्सले क्रमशः १६३ र १२१ रन बनाएका थिए । यी दुईले पहिलो विकेटका लागि २५९ रनको साझेदारी गर्दै अस्ट्रेलियालाई उत्कृष्ट सुरुआत दिलाएका थिए ।
मार्कुस स्टोइनिसले २१ र जस इङ्लिसले १३ रन बनाए ।
पाकिस्तानका साहिन साह अफ्रिदीले पाँच विकेट लिएका थिए । ह्यारिस रौफले तीन र उसमा मिरले एक विकेट लिए ।
जितसँगै चार खेलबाट चार अंक जोडेको अस्ट्रेलिया तालिकाको चौथो स्थानमा उक्लिएको छ । समान खेलबाट चार अंक नै जोडेको पाकिस्तान तालिकाको पाँचौँ स्थानमा छ ।
