राैतहट १४ असार
रौतहटको गढीमाई नगरपालिका–१ अन्तर्गत बागमती नदीको समनपुर हरैयाघाटमा आइतबार भएको दुःखद घटनाले स्थानीय बस्ती नै शोकमग्न बनेको छ। नदीमा नुहाउने क्रममा डुबेर दुई बालकको ज्यान गएको हो । मृत्यु हुनेमा गढीमाई–१ निवासी ८ वर्षीय अनिकेश यादव र सोही उमेरका आदित्य यादव रहेका छन्। दुवै बालक नुहाउने क्रममा नदीको तीव्र बहावमा बगिएको प्रारम्भिक जानकारी प्रहरीले दिएको छ ।
जिल्ला प्रहरी कार्यालय गौरका अनुसार खोजीका क्रममा दुवै बालकलाई नदीबाट मृत अवस्थामा निकालिएको हो । आदित्य यादवको शव घटनास्थलबाट करिब ५० मिटर दक्षिणतर्फ फेला परेको प्रहरीले जनाएको छ । घटनापछि समनपुर हरैयाघाट क्षेत्रमा शोकको वातावरण छ । जिल्ला प्रहरी कार्यालय गौरले घटनाबारे थप अनुसन्धान भइरहेको जनाएको छ । साथै वर्षायाममा नदीको बहाव तीव्र हुने भएकाले अभिभावकलाई बालबालिकाको सुरक्षामा विशेष ध्यान दिन पनि आग्रह गरिएको छ ।
बागमतीमा एकैसाथ दुई बालकको ज्यान गयो, समनपुर हरैयाघाट शोकमा डुब्यो
