गौर वितरण केन्द्रको कडाइ अभियान प्रभावकारी, एक महिनामै करोडभन्दा बढी बक्यौता उठ्यो

रौतहट १९ पुस
नेपाल विद्युत प्राधिकरणको गौर वितरण केन्द्रले बक्यौता महसुल असुली अभियानलाई तीव्र बनाउँदै पछिल्लो एक महिनामै एक करोड रुपैयाँभन्दा बढी रकम संकलन गर्न सफल भएको छ । लामो समयदेखि थन्किँदै आएको बक्यौता उठाउने उद्देश्यसहित केन्द्र प्रमुख धिरेन्द्र यादवको नेतृत्वमा कडाइका साथ अभियान सञ्चालन गरिएको थियो । अभियान अन्तर्गत बक्यौता रहेका उपभोक्तालाई लिखित सूचना प्रदान गर्ने, नियमित अनुगमन गर्ने तथा तोकिएको समयभित्र रकम नबुझाए विद्युत लाइन काटिने चेतावनी दिइएको केन्द्रले जनाएको छ । केही ठूला बक्यौतादार संस्था तथा उपभोक्तासँग किस्ताबन्दीमा रकम बुझाउने सहमति समेत गरिएको छ । यसले असुली प्रक्रियालाई थप प्रभावकारी बनाएको कर्मचारीहरूको भनाइ छ । केन्द्रका अनुसार बक्यौता संकलनमा वृद्धि भएसँगै ट्रान्सफर्मर मर्मत, विद्युत लाइन विस्तार तथा अनियमित आपूर्ति सुधारका कार्यलाई गति दिन सहज हुने अपेक्षा गरिएको छ । अभियानप्रति स्थानीय उपभोक्ताहरूले पनि सकारात्मक प्रतिक्रिया दिएका छन् । केन्द्र प्रमुख धिरेन्द्र यादवले समयमै महसुल नतिर्ने उपभोक्तामाथि नियमअनुसार कडा कदम चालिने स्पष्ट पार्दै भने, “यो अभियान निरन्तर जारी रहनेछ ।”